Hildur við Høgadalsá verður forkvinna í etiska ráðnum, sum landsstýriskvinnan í heilsu- og innlendismálum hevur tilnevnt.
Landsstýriskvinnan í heilsu- og innlendismálum hevur tilnevnt teir níggju limirnar, sum fara at mynda etiska ráðið komandi fýra árini. Ráðið fer til verka 1. januar, og endamálið við ráðnum er sambært heilsu- og innlendismálaráðnum at fremja og styrkja kjak og vitan um etiskar spurningar, sum knýta seg til nýtsluna av bip- og ílegutøkni, sum hava ávirkan á lívið hjá menniskjum.
Tey níggju tilnevndu eru:
Hildur við Høgadalsá er tilnevnd forkvinna. Hildur er útbúgvin sjúkrarøktarfrøðingur og hevur verið limur í Sjúkrarøktaretiska ráðnum, harumframt var hon eitt tíðarskeið forkvinna í ráðnum. Á yrkisleið síni hevur hon starvast víða innan heilsuverkið, har av meginpartin av tíðini á Sjúkrarøktarfrøðiskúlanum.
Tilnevnd av landsstýriskvinnuni í heilsumálum.
Steintóra Samuelsen, serlækni í gynækologi/obstretrik og starvast sum yvirlækni á Landssjúkrahúsinum.
Tilnevnd av landsstýriskvinnuni í heilsumálum.
Jógvan D. Hansen, útbúgvin Cand. Phil. og starvast sum lærari í heimsspeki.
Tilnevndur eftir tilmæli frá politisku flokkunum á løgtingi.
Richard Schwartzson, útbúgvin farmaceut MSc (IT) og er KT leiðari á Tjaldurs Apoteki.
Tilnevndur eftir tilmæli frá politisku flokkunum á løgtingi.
Sólbjørg Frederiksberg, útbúgvin fysioterapeutur og starvast á fysioterapideildini á Landssjúkrahúsinum.
Tilnevnd eftir tilmæli frá politisku flokkunum á løgtingi.
Jákup H. Foldbo, útbúgvin Cand. Scient. Soc. og starvast sum trivnaðarleiðari í Runavíkar kommunu.
Tilnevndur eftir tilmæli frá Kommunufelagnum.
Leif Olsen, útbúgvin sosialráðgevi og starvast sum ráðgevi í Almannaverkinum.
Tilnevndur eftir tilmæli frá landsstýriskvinnuni í almannamálum.
Debes H. Christiansen, útbúgvin lívfrøðingur og starvast sum deildarleiðari á Heilsufrøðiligu Starvsstovuni.
Tilnevndur eftir tilmæli frá landsstýrismanninum í uttanríkis- og vinnumálum.
Marjun Bæk, fyrrverandi sóknarprestur og hevur eisini í fleiri ár virkað sum sjómansprestur.
Tilnevnd eftir tilmæli frá landsstýriskvinnuni í mentamálum.
Tikið av heimasíðuni hjá Heilsu- og Innlendismálaráðnum.
