Fleiri hava gjørt vart við, at uppskotið til fiskivinnunýskipan bæði er drúgt og fløkt, og Høgni Hoydal ásannaði eisini í formansfrágreiðingini, at uppskotið umrøður nógv viðurskifti, sum krevja tøkniliga vitan og útrokningar.
Tað ber ikki til at gera fiskivinnulóggávu uttan slíkt. Í formansfrágreiðingini legði Høgni Hoydal fram eitt yvirlit yvir teir tríggjar høvuðstættirnir, sum hava verið mest frammi.
Her er stutta útgávan við spurningum og ivamálum í fiskivinnunýskipanini:
1. Stovnsrøkt og burðardygg veiða:
- Uppskotið er at fylgja fylgja lívfrøðiligum tilmælum og langtíðarætlanum fyri ymsu stovnarnar.
- Uppskotið er at fara til kvotuskipan fyri fiskiskap í føroyskum sjógvi. Tó fiskidagaskipan fyri útróður.
2. Treytir fyri virðisøking og virksemi í Føroyum
- Feløg og einstaklingar, ið hava rættindi at fiska skulu vera búsitandi og skattskyldug í Føroyum. 4 ára skiftistíð. Herdar treytir til skatting og vinningsbýti.
- Fiskur skal landast í Føroyum – minst 75%
- Alt skal til lands (høvd, ryggir, uggar, livur, rogn og innvølir). 4 ára skiftistíð.
- Veiða skal bjóðast út til føroysk virki – í minsta lagi 60 %.
- Øll manning skal fylgja sáttmálum hjá føroysku manningarfeløgunum, gjalda skatt og hava arbeiðs- og uppihaldsloyvi í Føroyum.
- Útflutnings-/innflutningskredittur verður skipaður (frystur fiskur o.a.)
- Munandi peningur verður sett av til at menna virðisøking og nýskapan kring landið.
- Betri eftirlit, revsireglur og góðskukrøv. Forhondsgóðkenning, tá ið bjóðast skal.
- Tilfeingisgjald skal gjaldast fyri at fiska, har ein tilfeingisrenta er. Antin við útboði ella við ásettum gjaldi av bruttovinningi.
3. Atgongd at fiska og at bjóða seg framat
- Feløg/fólk hava atgongd – ikki knýtt at stáli og veiðiloyvi. Tó øll skip í føroyskari skipaskráseting.
- Verandi í vinnu í dag hava fiskirættindi í mun til søguligt tal
- Nýggj rættindi verða boðin út – ein minni partur kann bjóðast út við treytum um tilknýti/virksemi í økjum í landinum.
- Antitrustreglur – ikki aftureftirvirkandi, men frameftir 12% fyri tað samlaða og millum 15 og 35% fyri einstaka fiskaslagið
