Skeið í Parkinsonsjúku

Heilsu- og umsorganartænastan hjá Tórshavnar kommunu, Norðoya Bú- og Heimatænasta og Parkinsonfelagið hava í felag skipað fyri skeiði í parkinson. 

Heilsu- og umsorganartænastan hjá Tórshavnar Kommunu og Norðoya Bú- og Heimatænasta hava saman við Parkinsonfelagnum skipað fyri skeiði í parkinsonsjúku. Fakfólk úr Danmark og úr heilsu- og almannamálaráðnum í Føroyum hava havt fyrilestur á skeiðinum og prógvhandan var á skeiðnum 27. oktober.

Skeiðið er skipað eftir donskum leisti, har danska parkinsonfelagið hevur sett eina útbúgving í parkinsonsamskipan í verk.

Endamálið við skeiðnum hevur verið:

-Menna dygdina í arbeiðnum hjá heilsustarvsfólkum í mun til vegleiðing, stuðul, rehabilitering, røkt og umsorgan fyri menniskjum við parkinsonsjúku og teirra avvarðandi í gerandisdegnum

-Styrkja og menna samstarvið tvørtur um fak og geirar fyri at tryggja, at menniskju við parkinsonsjúku fáa eina so góða og samanhangandi sjúklinga- og/ella borgaragongd sum gjørligt. 

Smæran í Klaksvík hevur verið karmur um útbúgvingina. Til prógvhandanina hildu Jógvan Skorheim, borgarstjóri í Klaksvík og Bergunn Kass úr Tórshavnar kommunu røðu.

Í tíðindaskrivi sigur Klaksvíkar kommunu, at fyrireikarinir vóna, at:

– vitanin, heilsustarvsfólk hava ognað sær, fer at gagna menniskjum við parkinsonsjúku og familjunum, soleiðis at tey við rættari viðgerð og stuðli í størstan mun kunnu varðveita sínar førleikar og virkna leiklut í samfelagnum.

Tað eru serliga fólk innan eldratænastuna, ið hava luttikið á skeiðnum.