Gangandi skógvar útsettir ein tíma

Útikonsertin við føroyska jassbólkinum Gangandi skógvar verður nú kl. 17 í Perlutúninum í Tórsgøtu. 

Perlutúnið verður karmur um eina jasskonsert við nýskrivaðum, føroyskum jassi. Ætlanin var, at konsertin skuldi byrja kl. 16, men tað verður nú kl. 17 ístaðin.

Bólkurin Gangandi Skógvar gandar sín egna jass út til fólkið, og tað er heilt ókeypis at lurta. Tiltakið er partur av nýggja konseptinum hjá Reinsarínum við útikonsertum í Perlutúnium alt summarið.

Gangandi Skógvar er ein eksperimenterandi jassbólkur, ið spælir egin løg, har improvisatión setir stóran dám á.

Limirnir í bólkinum eru Harald Fonsdal Johannesen, Bergur Fonsdal Johannesen og Rasmus Vigant Samuelsen.